Job 6

Iob i bor ra umana talaina

1Ma Iob i ga tata ma i ga biti:

2Boina ba da valar kaugu ninga rao.
Ma da vung varurungane ra agu lavur varmonong ta ra valavalar na mamat!
3Na ga mamat ta dir ma ra veo ra valian;
Damana iau tar tata vakuku.
4Ra Dekdek Muka i ga kalie kana umana pu tagu,
Ma ra tulungeagu i mome ra taring ta diat;
A lavur varvaburut kai God dia tut ure iau.
5Dave, a kuabar na as i tangi ba i en ra vura,
Ba ra bulumakau ba i en ra ana nian?
6Dave, di en ra nian ba pa i kalami laka ba pa di vung ra solt tana,
Ba di dum kilang ra kubika ta ra kiau?
7A balagu i ole pi na bili diat,
Dia da ra kaina viono tagu.
8Gala da pait ot pa kaugu nilul,
Gala God na tul tar ra magit i tagu iau anan upi ia!
9Boina ba God na rumam iau,
Ma na tulue ra limana ma na tak vue kaugu nilaun!
10Damana ina ki na varmaram,
Maia, ina gugu ta ra ngala na kinadik;
Tago pa iau ga pue vue ra tinata kai ra Lia Kakit.
11Akave ra dekdekigu pi ina tur padikat?
Ma ava ra mutuaigu pi ina ki vovovon?
12Dave, ra dekdekigu i varogop laka ma ra dekdek i ra umana vat?
Dave, di ga pait laka ra viogu ma ra palariam gobol?
13A dovotina pa ta maramaravut i ki piragu,
Ma di ga tak vue ra minatoto par kan iau.
14I topa ia ba ra umana talaina diat a mari nina i bilua ra nuknukina,
Ma nina i to na panie kana nurnur tai ra Dekdek Muka.

15Ia kaka, a umana turagu dia ga vagu pa iau da ra tava alir,
Da ra tava alir i mama lulut.
16Nina i noro ma i kabu ta ra ngala na bata,
Ma ta ra madoldol na mavoko ba i polo.
17Ba i malamalapang dia panie,
Ma ba ra keake i ongor, pa di na mule diat.
18A umana kiki na vinavana dia vana irai tadav diat,
Dia vana ta ra bil ma dia virua.
19A umana kiki na vinavana maro Tema dia ga tikan upi diat,
Ma ra tarai maro Seba dia ga nuknuk ung upi diat;
20Dia ga nurnur vaoloi,
Dia ga pot abara ma dia ga kaian.

21Amutal, amutal damana piragu;
Amutal gire kaugu kini na malari, ma amutal burut.
22Dave, iau ga biti ba, Amutal a tabar iau ma ta magit?
Ba, Amutal a tul tar ta magit tagu ta kamumutal tabarikik?
23Ba, Amutal a valangalanga iau kan ra lima i kaugu ebar?
Ba, Amutal a kul valaun iau kan diat dia arung bat iau?
24Amutal a tovo iau, ma ina ki mut,
Ma amutal a vateten iau ta ra magit iau ga rara tana.
25A umana takodo na tinata dia dekdek,
Ma ba amutal varpit, amutal varpit ure ra ava?
26Amutal a pit laka ra umana pakapakana tinata ka,
A tinata vakuku kai nina i purpuruan ra nuknukina?
27Amutal padapadailam upi nina i ki na lingling,
Ma amutal uviana tai talai mumutal.
28Ea, amutal a bobe iau,
Pa ina vaongo ta ra luaina mata i mumutal.
29Iau lul amutal, koko da pait ra nirara dari tagu,
Amutal a lilikun, tago pa di ga na tadav ta kaina mangamangana tagu.
Dave, i tar rara ra tinata ta ra karameagu?
Ma pa iau kairane mule vang ra kaina tagu?
30